【責備前不如先擁抱】
記得麥仔喺無意間話過，
我係一個有事發生時好想洗脫自己罪名嘅人。
我先慢慢諗番我真係咁，我由細到大都係咁。
以前細個我媽好惡，成日都鬧我同我哥
好似做咩都錯，好似郁啲都會畀人鬧咁，
由好細個我已經知道要活命就要學識生存之道。
所以我同我哥鬧交時，我媽一出現我會先將責任推畀我哥
我係嗰種會先大聲話阿哥蝦我(雖然真係)嘅乞人憎妹妹。
細細個我就一直搵生存機會去避免畀人鬧
記得小學讀書成續中上，有次默書得60幾分我好驚
因為好驚畀人鬧所以我第一時間諗到嘅係冒簽。
成長過程我一直都係咁，一直喺避免被指責中生存
所以我曾經為開脫講過大話，曾經推卸過自己嘅責任⋯
到呢幾日我又做咗一件非常非常戇鳩嘅事
我有好多刻諗過唔好同麥仔講，廢事佢會鬧我戇鳩
到最後我都係決定講，而佢都無鬧過我一句（心裡應該有）
我本身已經好崩潰，如果佢都鬧我就好似推我落深淵
佢無鬧我反而變咗深淵中嘅一對helping hand捉番住我。
然後我諗起之前我打過篇文，
講關於點解另一半會選擇喺小事上講大話
例如買咗貴野/偷偷地同朋友出街玩等等⋯
文中末段係咁：「⋯講大話背後嘅原因其實比較重要。
你想對方同你講真話，你就要有聽真話嘅氣量。」
我相信每一個另一半/小朋友都係一樣
如果好似我咁有個成日鬧人嘅媽媽，就會拼命去生存
如果講咩/做咩都預咗畀人鬧，自然會搵位逃脫
我曾經提醒過自己，如果將來有小朋友一定要記得
就算佢做錯事都唔好先指責，應該先擁抱
同埋應該先了解事情背後嘅原因同動機，再決定一切。
講真話同坦白自己嘅錯誤其實係好需要勇氣
如果可以先張開手擁抱，張開耳聆聽
就已經可以畀到對方勇氣。
【跪求】請支持我嘅寫作：
https://www.patreon.com/hkgirlfriend
（Patreon收入會將一半捐出）
IG：@hkgirlfriend
FB：港女友
Search